Verskeie leerders (vanaf graad 1 – Matriek) neem jaarliks deel aan die Tygerbergse Eisteddfod.  Die leerders word ingeskryf in die verskeie afdelings, soos  Handskrif,  Kuns, Spreekkoor en Voordrag.

Die Eisteddfodbeoordeling vind in Augustus plaas.  Die leerders geniet dit baie en dit bevorder ’n goeie selfbeeld.  Die sukses wat die leerders hier ervaar word ook positief oorgedra na hulle akademiese vordering.

Me C Davis het die senior koor in 2003 begin met 12 lede. Hulle eerste optrede was by die jaarlikse Koorfees waarvan Jan Krielskool die gasheer is.

Na hierdie optrede het Me Davis die koor se potensiaal besef. Die koor tree gereeld op by die Tygerberg Eisteddfod, Koorfees, Gala-aand en die laaste skooldag van die matrieks.

Die koor moet verskeie uitdagings oorkom. Hulle het net 45 minute per week beskikbaar vir konstruktiewe oefentyd en net ‘n klein groepie leerders beskik oor die nodige talent en toewyding. Daar is ook gebrek aan ‘n voltydse begeleier.

Dit is aangrypend om te sien hoe leerders die kooroefening geniet en hoe dit bydra tot die verandering in gedragspatrone onder die leerders. Die koorlede geniet dit om voor hul maats op te tree.

Ons het sopas ons jaarlikse kamp te Tulbagh Watervalkampterrein gehad, en wat ‘n wonderlike ervaring was dit! Een van die jeugwerkers/leraars in die gemeenskap het met ‘n span van 6 jongmense die programme vir ons aangebied.

Die leerders kies self hulle kringleiers. Vanjaar is daar 10 leiers wat verantwoordelik is om maats in te trek en te begelei in hulle geestelike groei. Hulle vergader weekliks om programme saam te stel vir die groter byeenkoms wat elke Woensdag plaasvind.

Ons het ‘n kompetisie geloods tussen die lede met die doel om ‘n eie naam vir ons groep te vind.

T.U.G. – The Ultimate Generation sal volgende kwartaal bekend gestel word, met ons eie, nuwe embleem op T-hemde en naambordjies.

Redenaarskompetisies (junior en senior) word kwartaalliks gehou sodat ‘n redenaar aangewys kan word wat die redenaarsbeker by die Prestige-aand ontvang.

Elke Woensdag bied die sekondêre skool ‘n Kultuur- of lewensvaardigheidsprogram aan waartydens ‘n wye verskeidenheid aktiwiteite aangebied word.

Voorbeelde is sprekers oor lewensvaardighede, ‘n gesonde lewenstyl, talentkompetisies, musiekprogramme, sangers, kunstenaars, bewusmaking van hul erfenis, omgewingbewaring, filmstudie, voorlees, vasvra, algemene kennis, sportsterre wat die skool besoek, instrumentale musiekvertonings.